Kappingar á internetinum, næstan ókeypis gávur og royndarskeið – hvat skalt tú gera?

Tað eru tey bæði ráðini, ið brúkaraumboðið gevur brúkarum, sum eru við í kappingum á netinum og fáa tilboð ígjøgnum netið og í teldubrøvum.

Nógv eru tilboðini um at vera við í kappingum, tilboð um ókeypis royndarpakkar, næstan ókeypis gávur, ókeypis royndartíð og annað tílíkt. Tú kanst fáa tilboðini sum teldupost, í eini bannaralýsing á t.d. Facebook, tá ið tú ert við í sonevndari brúkarakanning á netinum ella líknandi.

Slík tilboð eru næstan altíð treytað av, at tú samtykkir at taka ímóti marknaðarførslutilfari sum teldupost ella at verða uppringd/ur av nógvum ymiskum vinnurekandi.

Fyrr var vanligt, at vinnurekandi høvdu kappingar fyri at skapa áhuga fyri sínum navni og vørum, men treytir vóru ongar við. Soleiðis er ikki longur.

Tilboðini um at vera við í kappingum, tilboð um næstan ókeypis gávur og royndarpakkar tykjast fullkomiliga meinaleys. Kravið um at geva teimum gjaldkortupplýsingar verður sagt at vera, at postgjaldið fyri gávuna t.d. skalt tú sjálv/ur rinda. Royndirnar hjá brúkaraumboðunum eru, at slík tilboð vanliga eru krøkt uppí, tá ið tú teknar eitt hald ella líknandi. Tað stendur kortini ikki greidliga, og tú varnast tað helst ikki, lesur tú ikki tekstin og treytirnar gjølla.

Ver serliga varin, tá ið tú gevur hesar upplýsingar.

Vanliga skulu upplýsingarnar verða brúktar til at senda tær lýsingar sum sms ella til at ringja til tín. Kanna eftir, hvussu nógv vinnurekandi kunnu snúgva sær til tín og tak støðu til, um tú vilt tað. Kanna, um upplýsingarnar siga, hvussu tú lættliga kanst ógilda títt samtykki, ella um tú mást venda tær til hvønn einstakan teirra, um tú fert at troyttast av áheitanum.

Tú kanst verða biðin um at geva gjaldkortupplýsingar ella eina symbolska upphædd fyri eina vøru. Les altíð treytirnar og allan annan tekst gjølla fyri at síggja, um tú, tá ið tú tekur av tilboðnum, samstundis gert avtalu um eitt hald ella líknandi, sum verður goldið av tínum korti.

Sambært persónsupplýsingarlógini kunnu almennir myndugleikar, t.v.s. lands- og kommunalir myndugleikar, brúka p-
Tá tað snýr seg um privat, t.e. fyritøkur, virkir v.m., eru reglurnar fyri nýtslu av p-talinum strangari og hesi kunna bara viðgera p-talið, um
1. viðgerðin er heimilað í lóg
2. skrásetti nágreiniliga hevur givið sítt samtykki, ella
3. viðgerðin bert fer fram til søgulig, vísindalig ella hagfrøðilig endamál.

Fært tú tilboð um royndarpakka til vakurleika- ella heilsuvørur ella royndarskeið á eini datingsíðu, skalt tú kanna gjølla, um tú bindur teg til nakað. Kanna eftir, um haldið heldur fram, tá ið royndartíðin er farin.

Mótmæl beinanvegin hjá tí vinnurekandi og sig, at tú onga avtalu hevur gjørt. Bið vinnurekandi leggja fram prógv um, at avtala er gjørd.

Sigur vinnurekandi, at tín IP-adressa hevur verið nýtt , tá ið vøra ella tænastuveiting varð bíløgd, er tað í sjálvum sær einki prógv um, at tú hevur gjørt avtaluna. Bið um loyvi at síggja tilboðið, sum tú sigst hava tikið av. Bara í teimum førum, tað er heilt greitt, at tilboð er um at keypa vøru ella tænastuveiting, og tú hevur tikið av tilboðnum, hevur tú skyldu at gjalda.

Heldur vinurrekandi uppá, at tú hevur gjørt avtalu ígjøgnum telefonáheitan á teg, er avtalan bara í gildi, hevur tú frammanundan givið “ týðiliga og greidliga” samtykki um at verða ringd/ur upp.

Vinnurekandi má ikki krevja áminningargjald ella senda málið til uttanrættarliga innheintingar, noktar tú at hava gjørt avtalu.

Hava tínar kortupplýsingar verið nýttar at taka haldaragjald ella tílíkt , sum tú ikki hevur gjørt avtalu um, kanst tú snúgva tær til bankan. Bankin skal taka ta upphæddina aftur, sum er oman fyri ta upphædd, ið avrádd er, ella ta upphædd, sum tú ikki hevur givið vinnurekandi loyvi til at taka av kontuni.

Er kravið latið til innheintingar, skalt tú kæra til inkassovirkið og greiða frá, hví tú ikki vilt rinda.

Tá ið tú hevur boðað innheintingarvirki frá, at tú heldur teg ikki at gjørt avtalu við vinnurekandi um at keypa vøru ella hevur teknað nakað hald, má innheintingarvirkið ikki halda fram við innkrevjingini. Fer tann vinnurekandi víðari við málinum, má hann lata málið upp í hendurnar á rættarligari innheinting við tí í hyggju at fara í rættin við málinum.