Ofta spurt um ómaksgjøld

Virkir kunnu áseta ella broyta gjøld, um viðskiftafólkið er kunnað um, at tað kann henda. Stórar broytingar skulu verða kunnaðar viðskiftafólkunum hvørt sær.

Eitt ómaksgjald er ein upphædd, sum verður goldin fyri eina serliga tænastu, funksjón ella veiting, sum er knýtt at keypinum av eini vøru ella tænastu, og sum ikki verður rindað fyri eina sjálvstøðuga veiting t.d. fakturakostnaður, gjaldskostnaður og uppsagnarkostnaður.

Brúkaraumboðið hevur eftirlit við ómaksgjøldum sambært lóg um marknaðarføring. Ómaksgjøld í fíggjarstovnum, t.d. bankum, verða stýrd av millum øðrum kunngerðum hjá fíggjareftirlitinum um góðan sið.

Eitt virki kann vanliga sjálvt gera av, hvønn eykakostnað tað vil krevja frá viðskiftafólkunum. Allur eykakostnaður skal kortini vera avtalaður við viðskiftafólkið t.d. í avtalutreytunum. Virkið skal gera viðskiftafólkinum púra greitt samlaða prísin á vøruni ella tænastuveitingini íroknað eykakostnað, fyrstu ferð brúkarin fær prísin ella tænastuveitingina at vita.

Virkið kann ikki skoyta upp í ella hækka eitt ómaksgjald, er hesin møguleiki ikki longu ein partur av avtaluni við viðskiftafólkið.

Ein kostnaður, sum møguliga seinni kemur fyri, t.d. gjald fyri avrit av gomlum rokningum, skal ikki verða partur av samlaða prísinum, men skal sjálvandi vera avtalaður millum partarnar, skal virkið krevja tað.

Eitt ómaksgjald kann ikki vera órímiliga høgt í mun til tænastuna, sum ómaksgjaldið fevnir um. Støddin á eykakostnaðinum skal t.d. svara til tær rímiligu útreiðslurnar, sum eru tengdar at gjaldinum, tikið verður ímóti.

Ja. Virkið kann gott áseta nýggj gjøld ella hækka verandi gjøld. Hetta skal tó verða avtalað við viðskiftafólkið, t.d. í avtalutreytunum, at slíkar broytingar kunnu koma fyri. Lýst skal eisini vera í avtalutreytunum, í hvørjum støðum og eftir hvørjum treytum virkið kann broyta ella áseta ómaksgjøld.

Nei. Viðskiftafólkini skulu verða kunnað um gjaldsbroytingar. Í mun til kravið um kunning verður skilt millum týðandi og minni týðandi broytingar.

Ein týðandi gjaldsbroyting metir brúkaraumboðið vera eina øking, sum er meir enn 10% av higartil gjaldi – uttan so er, at gjaldið má metast týdningarleyst í mun til prísin á tí vøru ella tænastuveiting, brúkarin hevur keypt.

Nýggj gjøld ella týðandi broytingar skulu verða kunnað hvørjum viðskiftafólki sær gjøgnum ein “varandi miðil”, t.d. teldupost ella bræv. Í kunningini skulu upplýsingar vera um støddina á nýggja/broytta gjaldinum.

Ber broytingin í sær, at viðskiftafólkið kann siga avtaluna upp, skal hetta eisini standa í kunningini.

Ein minni týðandi gjaldsbroyting skal ikki verða kunnað hvørjum viðskiftafólki sær. Kunningin kann tí t.d. verða givin við at upplýsa viðskiftafólkunum gjøgnum heimasíðuna hjá virkinum.