Prentmiðstøðin givið Brúkaraumboðnum tilsøgn sambært marknaðarføringslógini.

Í sambandi við, at Føroyska Málnevndin og fleiri onnur hava gjørt vart við, at ásetingin um at lýsingar og lýsingartilfar, sum verður sent út til húskini í Føroyum skal verða á føroyskum, so hevur Brúkaraumboðið tikið málið upp, fyri at fremja eftirlit við at lógin verður hildin.

Tá ið vinnumálaráðið sendi marknaðarføringslógina niðan í tingi, var lógin viðtikin uttan broytingar at kalla. Tó samtykti løgtingi eina áseting um at lýsingartilfar skal verða á føroyskum, sum verður sent út til føroyska brúkaran, fyri at ávirka keyp av vørum og tænastum.

Grein 7a.: sigur greitt:

§ 7a. Lýsingar og lýsingatilfar, sum er beinleiðis ætlað brúkarum í Føroyum, skal vera á føroyskum.
Síðani lógin kom í gildi tann 1. januar 2009 hava nógvar fyritøkur gjørt eitt stórt arbeiðið at týða til føroyskt donsk lýsingarbløð, so at hesi verða send út á føroyskum.

Hóast hetta eru nøkur lýsingarbløð, sum støðugt hava verið send út á donskum.

Mannagongdin hjá Brúkaraumboðnum er henda, sambært samráðingarmeginregluna í marknaðarføringslógini § 22 hevur:

1. Brúkaraumboðið fer altíð samráðingarvegin, sum helst skal enda við, at felagið gevur Brúkaraumboðnum eina skrivliga tilsøgn, um at ávís viðurskifti framyvir verða hildin.
2. Um so er at tilsøgnin ikki verður yvirhildin verður ein áminning send við eini freist.
3. Eftir hetta verður ein álegging send, sum síðani elvir til eitt rættarmál.

Brúkaraumboðið fegnast tí um,  at tað er eydnast at gera avtalu við Prentmiðstøðina P/F, har ið Prentmiðstøðin hevur givið tilsøgn um at lýsingar og lýsingartilfar bert verður útborðið, um so er at hesar lýsingar eru á føroyskum. Undantikið er tó lýsingartilfar, sum brúkarin hevur umbiðið.

Við hesum hevur Prentmiðstøðin sýnt góðan marknaðarføringssið, við at verða undangongu felag at halda marknaðarføringslógina. Innhaldið í tilsøgnini er í stuttum:

Prentmiðstøðin gevur hervið sambært marknaðarføringslógini § 22 tilsøgn til Brúkaraumboðið um:

at virka fyri at fremja góðan marknaðarføringssið, við at at ganga undan, so at  § 7a, har ið ásett verður at lýsingar og lýsingartilfar, sum er beinleiðis ætlað brúkarum í Føroyum, skal vera á føroyskum eisini verður framd.

Tað vil siga at útbering av slíkum lýsingum kann bert fara fram, um so er at lýsingar og lýsingartilfar er á føroyskum. Undantikið frá hesum er tó tilfar sum brúkarin sjálvur hevur bílagt.

Brúkaraumboðið fær dagliga nógvar fyrispurningar, sum verða avgreiddir beinanvegin, tó eru fleiri mál stovnað, sum Brúkaraumboðið arbeiðir víðari við.