Kappingar

Virkjum er loyvt at brúka kappingar sum lið í marknaðarførslu, eisini keypstreytaðum kappingum. Virkið skal kortini altíð gera brúkararnar varugar við korini fyri kapping – tað merkir: hvørji serkrøv og hvørjar sertreytir knýta seg at luttøkuni.

Kor og treytir fyri eina kapping skulu vera týðulig og gjøgnumskygd hjá brúkara at lesa og skilja.

Brúkarin skal m.a. fáa at vita um:

• Aldurs- ella staðaravmarkingar
• Virðið á hvørjum einstøkum vinningi
• Vinnaramøguleiki, og hvussu nógvir vinningar eru í kappingini
• Hvussu valt verður – hvussu vinnari ella vinnarar verða funnir
• Nær vinnari verður drigin
• Hvar og nær navnið á vinnara verður almannakunngjørt
• Treytir fyri nær vinningur verður latin, heintaður ella fyrnaður

Tvey ymiskt sløg av kappingum eru:

Tilvildarmerkt, tá ið vinnari verður funnin við lutakasti ella við spølum sum tombola, banko o.ø.

Avriksmerkt, tá ið luttakarar skulu gera eitthvørt, t.d. tekna eina tekning, koma við hugskotum til eyðkennismerki ella tí líkt.

Keypstreytaðar kappingar

Loyvt er virkjum at hava keypstreytaðar kappingar. At kapping er keypstreytað merkir, at brúkarin skal keypa eina vøru frá virkinum fyri at sleppa at vera við í kappingini.

Keypstreytaðar kappingar hava áður verið ólógligar, men tað forboðið fór úr gildi í 2015.

Skriva ongantíð, at brúkarin longu hevur vunnið ella fer at vinna, um gávan ikki er til, ella um brúkarin fær útreiðslur av at fáa vinningin.

Kappingar til børn og ung

Tá ið virki marknaðarføra seg t.d. ígjøgnum kappingar mótvegis børnum og ungum, galda skerpað krøv. Tað merkir, at virkini skulu ansa serliga væl eftir, at børn og ung skilja kappingarreglurnar, og at tey hava fingið at vita, at kappingin er liður í marknaðarførsluni hjá virkinum.

Kappingar á sosialum miðlum

Sum heild eru somu reglur galdandi fyri kappingar á netinum og sosialu miðlunum sum aðra staðni. Kor og treytir fyri kappingini skulu vera týðiliga frámerkt, so lesarin lættliga sær, hvørjar treytir eru heftar at luttøkuni.