Leiðreglur um marknaðarføring á teleøkinum (2)

Brúkaraumboðið hevur heimild sambært niðanfyri standandi áseting, at seta leiðreglur í gildi, sum hava stóran týdning fyri brúkaran. Teleøkið er eitt sera týðandi øki fyri brúkaran, og hvørt húskið í Føroyum hevur samband við ymiskar veitarar á teleøkinum.

§ 23. Brúkaraumboðið skal royna at ávirka vinnurekandi við at gera og almannakunngera leiðreglur um marknaðarføring á økjum, sum hava stóran týdning, serliga fyri brúkaran.
Stk. 2. Brúkaraumboðið kann, uttan mun til stk. 1, ikki gera leiðreglur, sum bert venda sær til fyritøkur, ið eru umfataðar av “Lov om finansiel virksomhed”.

Brúkaraumboðið hevur gjørt avtalu við Føroya Tele og Vodafone um leiðreglur á føroyska teleøkinum. Leiðreglurnar fevna um marknaðarføring, avtalutreytir og kundaviðgerð.

Klokkan 16 mánadagin, hin 3. mai 2010, skrivaðu umboð fyri Føroya Tele og Vodafone undir avtalu við Brúkaraumboðið, sum gevur fjarskiftisbrúkaranum nøkur rættindi, tá ið hann keypir ella leigar tænastur og útgerð frá veitarunum.

Brúkaraumboðið hevur heimild til at seta leiðreglur í gildi á økjum, sum hava stóran týdning fyri brúkaran. Hvørt húskið í Føroyum hevur samband við ein ella fleiri veitarar á teleøkinum, og tí valdi Brúkaraumboðið í fjør at fara undir at gera serligar leiðreglur á hesum øki.

Nú eru føroyskar leiðreglur orðaðar í neyvum samstarvi við partarnar á fjarskiftismarknaðinum. Endamálið er at fremja góðan marknaðarføringarsið, tí higartil hava ongar ásetingar hava verið um, hvussu farast skal fram, fyri at lógin um góðan marknaðarføringarsið verður hildin á hesum øki.

Vegleiðingin vendir sær beinleiðis til føroyska fjarskiftisbrúkaran. Millum annað verður staðfest, at tú hevur rætt til prísir, sum týðiliga upplýsa allar fastar og broytiligar kostnaðir, eitt nú minstu útreiðsluna hjá tær í einum tíðarskeiði, har tú ert bundin av avtaluni.

Rokningar skulu orðast greitt og týðiliga, og innan 1. mai 2011 skulu fjarskiftisveitararnir kunnu bjóða eina tænastu við saldoeftirliti, har brúkarin hevur møguleika at avtala, at tænastan verður stongd, um nýtslan fer upp um eitt ávíst mark.

Í leiðreglunum verður staðfest, at neyðugt er at vera serliga ansin, tá ið marknaðarført verður til ung og børn, tí tey eru løtt at ávirka og hava ikki somu royndir og sama ansni sum vaksin.

Sambært avtaluni koma leiðreglurnar í gildi frá 1. juni 2010.


7. Orðing av treytum

Tað er okkara skylda at tryggja, at avtalutreytirnar eru greiðar og lættar at skilja fyri teg.  Treytirnar eiga at geva tær neyðug rættindi og mugu ikki vera ov víðgongdar ella nøkur byrða fyri teg, um ikki serligur tørvur er á tí.  Eru ávísar treytir týðandi ella serliga tyngjandi, er tað okkara skylda at leggja dent á hesar í treytunum.