Iðranarrættur og umbýting tá vøran er í lagi

Afturberingarrættur: keyp í handli

Keyp er bindandi avtala, og tú kanst í grundini ikki iðra teg um keypið. Hóast fleiri handlar geva tær rætt til at bera aftur ella býta um, er tað ikki ein rættur tú hevur sambært lóg.

Seljarin ger sjálvur av, um hann gevur iðranarrætt, og hvørjar reglur, ið skulu galda í sambandi við iðranarrættin. Tað, ið er galdandi fyri iðranarrætt, skal verða avtalað, tá ið keypt varð, t.d. á kvittanini ella í treytum, sum handilin hevur.

Tað kann t.d. vera:

• Hvussu long freistin skal vera
• Um peningur fæst aftur, ella um býtast kann um við aðra vøru
• Um tú kanst fáa ein tilgóðarseðil

Hevur tú fingið lyfti um afturberingarrætt, skal tú hava peningin aftur.

Hevur tú fingið lyfti um umbýtingarrætt, kanst tú velja tær aðra vøru í handlinum.

Sum útgangsstøði mást tú vænta, at vøran skal latast inn aftur í slíkum standi, at hon kann seljast aftur sum nýggj. Vanliga er tað ein fortreyt, at vøran sær út sum nýggj og óbrúkt, at øll merki framvegis eru á vøruni, at upprunapakningur er óskalaður o.a.

Mælt verður til, at vinnurekandi greitt upplýsa um treytirnar fyri at taka vøruna aftur, tá keypt verður. 

Tað kann t.d. vera:

• At vøran sær út sum nýggj óbrúkt
• At vøran verður latin inn aftur í upprunapakningi
• At øll merki eru á vøruni
• At plomberingar ikki eru brotnar 

Iðrar tú teg um keypið, skalt tú prógva, hvar og nær, tú hevur keypt vøruna, hvat hon kostaði, og at tú hevur fingið lyfti um rætt til at býta um ella lata vøruna inn aftur. Tí er umráðandi, at tú goymir kvittanina og fært skrivað á hana, at tú hevur iðranarrætt, um tað ikki stendur á frammanundan.

Iðranarrættur – handil við privatpersón

Handlar tú við privatpersón, hevur tú bara iðranarrætt, um tað er avrátt tykkara millum frammanundan.

Passar vøran ikki, ella er hon ikki, sum tú hevði vónað, er best at hava greiða avtalu við seljaran.

Avtala tí við seljaran, at tú kanst iðra teg um keypið, áðrenn tú keypir.